काठमाडौं । नेपाल ब्याडमिन्टन संघको आयोजनामा नेपालमा दोश्रो पटक अन्तर्राष्ट्रिय च्यालेन्ज हुने भएको छ । विश्व ब्याडमिन्टन महासंघ र ब्याडमिन्टन एशियाको स्विकृतीमा योनेक्स सनराईज नेपाल च्यालेन्ज २०२४ मा विश्वका पाँच महादेशका नेपालसहित २२ देशका खेलाडीहरुले प्रतिस्पर्धा गर्ने छन् ।
जसमा नेपालसहित भारत, अमेरिका, थाईल्याण्ड, सिंगापुर, श्रीलंका, बंगलादेश, भियतनाम, क्यानडा, मलेशिया, ईन्डोनेशिया, ईरान, ईटाली, युनाईटेड अवर ईमिरेट, जाम्बिया, युगाण्डा, ईङ्गल्याण्ड, न्यूजील्याण्ड, म्यानमार, अष्ट्रेलिया, युक्रेन, जापान रहेका छन् । च्यालेन्जमा पुरुष/पुरुष एकल तथा युगल तथा मिक्स युगल गरि पाँच विधामा प्रतिस्पर्धा हुने बिहिबार आयोजित पत्रकार सम्मेलनमा जानकारी गराईयो । जसमा १७४ खेलाडीहरुले प्रतिस्पर्धा गर्ने छन् ।
१५ हजार अमेरिकी डलरको पुरस्कार राशी रहेको प्रतियोगितामा सबै विधाका विजेता, उपविजेता, सेमिफाईनलिष्ट र क्वाटरफाईनलिष्टका खेलाडीहरुले क्रमशः १२ सय डलर, ७२० डलर, ६ सय डलर र ४८० डलर प्राप्त गर्ने छन् । च्यालेन्ज यहि पौष ८ गते सोमबार देखि ११ गते बिहिबार सम्म संचालन हुने छ । यस्तै च्यालेन्जको लगतै १२ गते शुक्रबारदेखि १४ गते आईतबारसम्म योनेक्स सनराईज नेपाल जुनियर अन्तर्राष्ट्रिय सेरिज २०२४ आयोजना हुनेछ । जसमा नेपालसहित भारत, न्युजिल्याण्ड, मलेशिया, थाईल्याण्ड, ईरान, युनाईटेड अरव ईमिरेट्सका खेलाडीहरुको सहभागिता रहने छ ।
सिरिजमा पुरुष/महिला एकल तथा युगल र मिक्स युगल गरि ५ विधामा प्रतिस्पर्धा हुने आयोजकले जनाएका छन् । जसमा १०७ खेलाडीहरुले विभिन्न विधामा प्रतिस्पर्धा गर्ने छन् । सिनियर तर्फ ९ पुरुष र ७ महिला तथा जुनियर तर्फ ८ पुरुष र ८ महिला खेलाडीहरुले प्रतिस्पर्धा गर्ने नेपाल ब्याडमिन्टन संघका अध्यक्ष रामजी बहादुर श्रेष्ठले पत्रकार सम्मेलनमा जानकारी गराए । योनेक्स सनराईज कम्पनी, सिंगापुरले मुख्य प्रायोजन रहेको च्यालेन्ज र सिरिजको लागत करिव १ करोड १६ लाख रहेको छ ।
योनेक्सले १५ हजार अमेरिकी डलरका साथ सहभागी नेपाली खेलाडीहरुलाई खेल पोशाक र ४ सेट ब्याडमिन्टन कोर्ट उपलब्ध गराउने छ । यस्तै बाँकी रकम राष्ट्रिय खेलकुद परिषद्, बागमती प्रदेश खेलकुद बिकास परिषद् तथा विभिन्न बैंक तथा कम्पनीहरु र सहयोगी संघ संस्थाबाट पूर्ति गरिने अध्यक्ष रामजी बहादुर श्रेष्ठले जानकारी गराए । च्यालेन्ज र सिरिज त्रिपुरेश्वरस्थित राष्ट्रिय खेलकुद परिषद्को कभर्डहलमा खेलाईने छ ।
