काठमाडौं । बेलायती कोभेन्ट्री विश्वविद्यालयबाट सम्बन्धन लिएर स्नातक, स्नातकोत्तर तहमा आईटीसम्बन्धीका विभिन्न शैक्षिक कार्यक्रम सञ्चालन गरिरहेको सफ्टवेरिका कलेज अफआईटी एन्ड ई–कमर्सले स्नातक तहमा नयाँ शैक्षिक कार्यक्रम ल्याएको छ । कलेजले सोही विश्वविद्यालयको सम्बन्धनमा ‘बीएससी (अनर्स) कम्प्युटर साइन्स विथ आर्टिफिसियल इन्टेलिजेन्स’ विषयअन्तर्गत नयाँ पठनपाठन अध्यापन गर्ने भएको हो ।
सफ्टवेरिकाले नयाँ तीनवर्षे शैक्षिक कार्यक्रम यसै शैक्षिक सत्रबाट अध्यापन सुरु हुने जनाएको छ । कलेका अनुसार कार्यक्रमको पाठ्यक्रममा आधारभूत कम्प्युटर विज्ञान र आर्टिफिसियल इन्टेलिजेन्स (एआई) विशेषज्ञतालाई एकीकृत गरिएको छ । जसले गर्दा कार्यक्रममा भर्ना हुने विद्यार्थीले अहिले चर्चामा रहेको एआईको क्षेत्रमा विज्ञता हासिल गर्न सक्ने छन् ।
शैक्षिक कार्यक्रमबारे कलेज प्रमुख प्रमोद पौडेलका अनुसार नयाँ पाठ्यक्रममा अहिले द्रुत गतिमा विकास भइरहेको एआई क्षेत्रको विशेषज्ञ हुन आवश्यक पर्ने व्यावहारिक सीप र सैद्धान्तिक ज्ञान यस कार्यक्रममा समावेशछ । साथै, विद्यार्थीले एआई, मसिनलर्निङ, प्यारारल प्रोग्रामिङ र डेटा विज्ञान कसरी जोडिएका छन् र तिनीहरूले कम्प्युटर विज्ञानलाई कसरी परिवर्तन गर्दैछन् भन्ने विषय पढ्ने छन् अर्थात् यो समग्रमा कम्प्युटर विज्ञानसँगै एआईमा विज्ञता हासिल गराउने शैक्षिक कार्यक्रम हो ।
उनका अनुसार यस विषयका लागि कार्यक्रममा प्रोग्रामिङ एन्ड एल्गोरिदम, सफ्टवेयर डिजाइन, कम्प्युटर आर्किटेक्चर एन्ड नेटवर्क, क्रियटिभ थिङ्किङ फोर बिजिनेस, इन्ड्रोडक्सन टू आर्टिफिसियल इन्टेलिजेन्स, सफ्टवेयर इन्जिनियरिङ, एड्भान्स एल्गोरिदम, अपरेटिङ सिस्टम एन्ड सेक्युरिटी, मसिनलर्निङ एन्ड रिलेटेड एप्लिकेशन, डिजाइन थिङ्किङ एन्ड इनोभेसनलगायतका विषय राखिएका छन् ।
कलेजका अनुसार यी विषयहरू लेक्चर, सेमिनार, प्रयोगशाला, कार्यशाला, अनलाइन, समूह जस्ता विभिन्न विधि तथा माध्यमबाट पठनपाठन हुने छ । यस कार्यक्रममा भर्ना हुन कक्षा ११/१२ मा न्यूनतम २.० जीपीए अथवा ए लेभलमा भए ३.५ क्रेडिट ल्याएको हुनपर्नेछ ।
वर्षमा स्प्रिङ र अटम गरी दुई इन्टेकमा भर्ना खुला हुने यो कार्यक्रममा विज्ञान, व्यवस्थापन वा मानविकी समूहका विद्यार्थी भर्ना हुन सक्ने छन् । कार्यक्रम अध्ययन पछि विद्यार्थीहरूले एआई सफ्टवेयर डेभलपर, डेटा साइन्टिस्ट, सफ्टवेयर इन्जिनियर, सिस्टम आर्किटेक्ट, एआई रिसर्चर, प्रोजेक्ट म्यानेजर, डेटा इन्जिनियर आदि बन्न सक्ने छन् । कलेजले यो कार्यक्रमको शुल्क १२ लाख ३१ हजार रुपैयाँ राखेको छ ।
त्यस्तै, सफ्टवेरिका कलेजका अनुसारले कलेजले पढाउने बीएससी (अनर्स) कम्प्युटिङ, बीएससी (अनर्स) इथिकलह्याकिङ एन्ड साइबर सेक्युरिटी, बीएससी (अनर्स) इथिकलह्याकिङ एन्ड साइबर सेक्युरिटीलगायतका विषय आईटी शिक्षामा रुचि भएका विद्यार्थीमा लोकप्रिय रहेको छ ।
