काठमाडौं । नेपाली राष्ट्रिय क्रिकेट टोलीका पूर्वअलराउन्डर मनिष राज पाण्डे भक्तपुर जिल्ला क्रिकेट संघको अध्यक्षमा निर्वाचित भएका छन् । क्रिकेट खेलाडी संघ नेपाल (सिप्यान) को अध्यक्ष समेत रहेका पाण्डेले अर्का प्रत्यासी रुपक रन्जितलाई २ भोटले हराउँदै निर्वाचित भएका हुन् ।
मनिष राज पाण्डेले १४ भोट ल्याउँदा रुपक रन्जितले १२ भोट प्राप्त गरे । त्यस्तै उपाध्यक्षमा अम्पायर धर्म सुन्दर शाक्य विजयी भएका छन् । शाक्यले १४ मत प्राप्त गर्दा अर्का प्रत्यासी कुन्दन राज सुवेदीले १२ भोट प्राप्त गरेका थिए ।
भक्तपुर जिल्ला क्रिकेट संघको सचिवमा सन्जय बस्नेत विजयी भए । सन्जय बस्नेत र अर्का प्रत्यासी किशोर चौगुटीको समान १३/१३ भोट भएपछि चिठ्ठाबाट निर्णय लिईएको थियो । कोषाध्यक्षमा कवि खागी विजयी भए । कवि खागीले प्रतिद्वन्दी सागर पलिखेललाई २ मतले हराएका थिए ।
त्यस्तै, सदस्यमा सुरज शाक्य, स्वस्तिका पौडेल, रोम श्रेष्ठ, बुद्धिराम तामाङ, राजेश कुमार ठाकुर, सुमन रन्जितकार, रत्न हरि प्रधानागं, निरा राजोपाध्य, अभय राणा र नगेन्द्र भट्टराई चुनिएका छन् ।
यसै साता सम्पन्न चितवन जिल्लामा सुदीप पिया, मकवानपुरमा करन महत्रा क्षेत्री, ललितपुरमा शेखर श्रेष्ठ, नुवाकोटमा दुर्गाराज पठक अध्यक्षमा निर्वाचित भएका थिए । काठमाडौंको चुनाव भने हुन बाँकी छ । बागमती प्रदेशमा नेपाली राष्ट्रिय टोलीका पूर्वकप्तान पारस खड्का अध्यक्षमा उठ्नेछन् ।
